“Wolarsen” нэртэй өөрийн брэнд уруулын будгаа худалдаанд гаргаад байгаа загвар өмсөгч Х.Намуун олон нийтэд МУГЖ Д.Хүрэлхүүгийн охин гэдгээрээ илүүтэй танигдсан бүсгүй. Аавтайгаа хамт “Тусгай ажиллагаа” киноны гол дүрд тоглосон тэрбээр эдийн засгийн чиглэлээр суралцсанаа ч умартах дөхөж дэлгэцийн урлагт шимтэх болсон. Энэ ч утгаараа, төд удалгүй “Шуугиан таригч” киноны гол дүрд амжилттай тоглоод байгаа Х.Намуун таван өнгийн сонголттой уруулын будгаар фэн бүсгүйчүүддээ бэлэг барьсан.
Томоохон худалдааны төвүүдэд “Wolarsen” гэхээсээ илүүтэй “Хүрлээгийн охины будаг” нэрээр зарагдаж байгаа энэхүү бүтээгдэхүүнийхээ сурталчилгааг ч Х.Намуун өөрийн цахим хуудсаар тасралтгүй хийж байгаа. Мөн олны танил, урлаг соёлын бүсгүйчүүдээр рекламдуулж хэрэндээ л борлуулалт сайтай байгаа бөгөөд энэ удаа ээлжит нэгэн сюрпризээ барихаар зэхэж яваа гэнэ.
Тэрбээр тун удахгүй нүдний тень гаргах гэж байгаа төдийгүй өмнөх бүтээгдэхүүнийхээ талаархи санал шүүмжлэлийг ч сайтар тусгаж авсан аж. Өөрийнхөө нүүр, гарыг туршилтын “бай” болгоод байгаа үзэсгэлэнт бүсгүй маань үснийхээ өнгийг ч эрс өөрчилж орхижээ. “Mixx” хамтлагийн гишүүн О.Гүнчин-Иштэй үерхэж байсан Х.Намууны хувьд найз залуугаасаа салсныхаа дараа чөлөөт стилиэр хувцаслах болж, бүр цагаан үсээр гоёхыг илүүд үзсэн нь энэ.
