Ядах юмгүй бэлдэж болох хэрнээ ядарсан, суларсан, гундсан арьсыг гайхалтай засан сэргээж, таатай сайхан мэдрэмж өгөх энэ маскуудыг туршаад үзээрэй.
Алим шиг олдоцтой жимс үгүй. Амтархан идэхэд шүүслэгдүү сайхны дээр, жигнэж хэрэглэхэд ханиад эдгээх шидтэйгээс гадна арьсыг өнгөлөг болгох увдистайг мэдэх үү?
Алимыг нарийн үрүүлээр үрж нухаш болгоод марль, салфетганд түрхэн нүүрэндээ тавьна. Хуурай арьстай бол эхлээд нүүрээ үл ялиг ургамлын тосоор арчаад маскаа тавиарай. 15-20 минутын дараа бүлээн буцалсан усаар угаана.
Алимны нухшан дээр 1 хоолны халбага нунтагласан овъёос, 1 цайны халбага зөгийн бал, 1 хоолны халбага буцалсан ус хийж сайн хутгаад нүүрэндээ 15 минут тавихад хөгширч суларсан арьс сайхан сэргэж өгнө. Мэдээж маскаа аваад бүлээн усаар хөнгөн угаана.
Арьс чийгшүүлэх маскийг алимаар хэрхэн бэлдэх вэ? Хэрчсэн алимыг бага зэргийн усанд зуурмаг зутан шиг болтол нь чанаарай. Гэхдээ хэт удаан чанаж болохгүй шүү. Үүн дээрээ бага зэргийн сүү нэмээд зөөлөн галаар дахин 2 минут буцалга. Жаахан хөргөөд бүлээн болмогц нүүрэндээ тавина. 20 минутын дараа угаах юмуу шингэлсэн сүүгээр цэвэрлэнэ.
Арьсыг өнгөлөг болгохын тулд 2 цайны халбага алимны нухашыг 1 хоолны халбага халуун цөцгийтэй холино. Тослог арьстай бол 1 өндөгний цагааныг хөөсөртөл хутгаад дээрээс нь нэмж өгнө. Нүүрэндээ 20 минут тавиад буцалсан бүлээн усаар хөнгөхөн угааж цэвэрлэнэ.
Гоё сайхан байхад үнэтэй бүтээгдэхүүнээс илүүтэй арьсанд шимтэй оргиналь жимс ногоо, хүнсний бүтээгдэхүүнүүд хавьгүй тустай. Ядах юмгүй бэлдэж болох хэрнээ ядарсан, суларсан, гундсан арьсыг гайхалтай засан сэргээж, таатай сайхан мэдрэмж өгөх энэ маскуудыг туршаад үзээрэй. 7 хоногтоо нэг удаа хэрэглэхэд хангалттай.