Жүдо бөхийн 2015 оны Ази тивийн АШТ-ээс Ц.Мөнхзаяа Алтан медаль хүртэж Төрийнхөө дуулалыг эгшиглүүлсэн билээ. Түүний Алтан медаль хүртсэн нь биш аваргын төлөө барилдахдаа мөрөө гэмтээн тамирчин хүний тэвчээр хатуужилыг харуулсан нь Монгол түмний бахархан ярих сэдэв болсон юм.
Мөн Казахын Астанад болсон Дэлхийн аварга шалгаруулах тэмцээний дөрөвдэх өдөр хүрэл медалийн төлөөх барилдаанаа хийж ялалт байгуулан 10 жилийн хөдөлмөрөө үнэлүүлж чадсан нь мөн Монгол түмний Бахархал болсон. Асгарсан хөлс хүчний тоогоор амжилт гаргаж чадсан охиноороо Монгол түмэн дахин омогшиж, өөрсдөө медаль зүүсэн юм шиг баярласан.
Дэлхийн аваргаас ирсэний дараа анхны багш Баавайн Буядаа багшынхаа гэрт очсон зураг нь мөн л олны талархал хүлээсэн.
Тэрбээр Лондоны олимпод Словен жүдочоос ганц үнэлгээ илүү авсан бол анхны Олимпийн медальт эмэгтэй жүдоч болох байв. Гэхдээ түүнд харамсах зүйлгүй. Олимпын дараа хөөрхөн охинтой болж, жүдогийн татами дээрээ эрч хүчтэйхэн эргэн ирсэн билээ. Түүний дараагийн учраа РИО.
Риогийн татамид тэрээр эхний тойрогт Мароккогийн бөх Р.Зоуактай учраа таарсан. Дараагийн тойрогт Казахстан-Хятадын аль ялсантай хүч үзнэ. Эхний хоёр тойрогт түүний ялах магадлал өндөр байгаа бөгөөд хэсгийн аваргын төлөө Словений бөх Тина Трстеняктай барилдах юм. Лондоны олимпод медалиа Словен жүдочид алдсан Ц.Мөнхзаяа маань энэ удаа хариугаа чангахан авах биз ээ. Түүнийг ялж чадвал Израйлийн юм уу, Германы жүдочийн аль нэгэнтэй нь барилдаад хүсэн хүлээсэн медалиа авах боломжтой болно.
Тэнгэрт морилсон Б.Буядаа багшийнхаа атгаад алдсан медалийг, хайрт хань Халиуны Болдбаатарынхаа Атлантын олимпод луйвардуулсан медалийг Риогийн татамид аваарай.
Эх орон чинь, бяцхан охин чинь үзэсгэлэнт охиныхоо дээлийн захыг мушгин хүлээж байгаа шүү.
Ч.Амар
